లోకేష్ 100 రోజుల ప్రణాళిక ఎంతోమంది విద్యార్థుల జీవితాల్లో వెలుగులు నింపింది: హోంమంత్రి అనిత

ఆంధ్రప్రదేశ్‌లో విడుదలైన పదో తరగతి ఫలితాలపై రాష్ట్ర హోం శాఖ మంత్రి అనిత హర్షం వ్యక్తం చేశారు. విద్యాశాఖ మంత్రి నారా లోకేష్ కృషి, ఆయన ప్రవేశపెట్టిన 100 రోజుల ప్రణాళిక వల్లే ఈ అద్భుత ఫలితాలు సాధ్యమయ్యాయని ఆమె ప్రశంసించారు. విద్యార్థుల భవిష్యత్తు కోసం లోకేష్ తీసుకున్న ప్రత్యేక శ్రద్ధ కారణంగానే ప్రభుత్వ విద్యా వ్యవస్థలో గుణాత్మక మార్పు కనిపిస్తోందని అన్నారు.

ఈసారి పదో తరగతి ఫలితాల్లో ఉత్తీర్ణత శాతం గతేడాది 81.14 శాతం నుంచి 85.25 శాతానికి పెరగడం సంతోషకరమని మంత్రి అనిత పేర్కొన్నారు. ముఖ్యంగా ప్రభుత్వ పాఠశాలల్లో 78.39 శాతం ఉత్తీర్ణత నమోదు కావడం, బాలికలు 87.90 శాతం ఉత్తీర్ణతతో బాలుర కంటే ముందుండటం శుభపరిణామమని తెలిపారు. లోకేష్ దార్శనికతకు, పక్కా ప్రణాళికకు ఈ ఫలితాలే నిదర్శనమని ఆమె అభిప్రాయపడ్డారు.

జిల్లాల వారీగా ఫలితాల్లో పార్వతీపురం మన్యం జిల్లా రాష్ట్రంలోనే అగ్రస్థానంలో, విజయనగరం మూడో స్థానంలో, అనకాపల్లి ఆరో స్థానంలో నిలవడంపై ఆమె ఆనందం వ్యక్తం చేశారు. ఈ సందర్భంగా, పదో తరగతిలో ఉత్తీర్ణత సాధించిన విద్యార్థులకు, వారికి మార్గనిర్దేశం చేసిన ఉపాధ్యాయులకు మంత్రి అనిత అభినందనలు తెలిపారు. అదే సమయంలో, పరీక్షల్లో ఫెయిలైన విద్యార్థులు నిరుత్సాహపడకుండా, పట్టుదలతో మళ్లీ ప్రయత్నించి విజయం సాధించాలని ఆమె సూచించారు.